300 shishe me ilaçin ”Surfaktant” arrijnë në Kosovë
Fondacioni humanitar “Aksioni për Nëna dhe Fëmijë” dhuroi edhe këtë vit medikamentin e “Surfaktantit” në njësinë e Neonatologjisë në Qendrën Klinike Universitare të Kosovës. Këtë vit u dhuruan 300 shishe të këtij medikamenti jetik për foshnjet e Kosovës dhe ky donacion mbulon nevojën e njësisë për vitin 2016.
Pa “Surfaktant” të mjaftueshëm, mushkëritë e foshnjës nuk mund të zhvillohen dhe foshnjat e lindura parakohe vdesin. Bebet zakonisht nuk fillojnë prodhimin e surfaktantit deri disa javë pas lindjes. Kështu, medikamenti i surfaktantit është jetik për parandalimin dhe trajtimin e RDS (sindromës së ankthit të frymëmarrjes) dhe redukton shkallën e vdekshmërisë së foshnjave. Ky medikament shfrytëzohet afërsisht nga 250-300 foshnje çdo vit.
“Jemi të lumtur që këtë vit, me rastin e dorëzimit të medikamentit kemi të pranishëm edhe përfaqësues të AmeriCares, partnerit tonë nga SHBA-të. Fondacioni dhe AmeriCares bashkëpunojnë që nga viti 2009 dhe jemi të lumtur që ky partneritet do të vazhdojë edhe vitet në vazhdim, partneritet ky që siguron ardhjen e surfaktantit në Kosovë” – shprehet Mrika Aliu, drejtoreshë ekzekutive e “Aksionit për Nëna dhe Fëmijë.”
Ndërkaq, Dr. Mynevere Hoxha, drejtoreshë e Klinikës së Neonatologjisë shpreh mirënjohjet më të thella për fondacionin dhe partnerin amerikan për donacionin e ilaçit të surfaktantit tërë këto vite. “Ky medikament po shpëton jetë foshnjash”, ka theksuar ajo.
Medikamenti “Surfaktant” është shumë i shtrenjtë dhe sigurohet nga partneri shumëvjeçar i “Aksionit për Nëna dhe Fëmijë” – AmeriCares dhe Laboratorët Abbvie në SHBA.
