Studimi suedez zbulon një shkak të panjohur të autizmit
Fëmijët që lindin nga gra që vuajnë nga kistet në mitër janë të rrezikuar për të shfaqur çrregullime të spektrit autik. Ky është përfundimi i një studimi të kryer në Suedi nga Instituti “Karolinska”.
Rezultatet janë publikuar në revistën “Molecular Psychiatry”. Studimi është i pari që demonstron lidhjen mes sindromës policistike të nënave me çrregullimet e spektrit autik te fëmijët e tyre.
Këto çrregullime përfshijnë ndërveprimin social, të folurit apo sjelljet përsëritëse. Shkaqet e kësaj sindrome nuk janë tërësisht të qarta, por ka disa të dhëna që e lidhin ekspozimin ndaj hormoneve të seksit në fazën e hershme të jetës me rrezikun e zhvillimit të saj.
Këto hormone, që njihen ndryshe si androgjene, janë përgjegjëse për zhvillimin e sjelljeve tipike. Ato ndikojnë edhe në zhvillimin e trurit dhe sistemit nervor qendror.
Studiuesit kanë përdorur të dhënat në shkallë vendi për gjendjen shëndetësore të fëmijëve nga mosha 4-17 vjeç, të lindur nga viti 1984 deri në vitin 2007.
Sipas tyre, një nënë që vuan nga sindroma policistike në mitër ka 59 % më shumë rrezik për të lindur një fëmijë autik se një nënë e shëndetshme.
Pavarësisht të rejave që sjell studimi në kërkimet për shkaqet e autizmit, ai nuk shpjegon se pse numri i djemve që vuajnë nga këto çrregullime është katër herë më i madh se i vajzave.